Mālama Pono!

E ka lāhui, e mālama pono no ka makani pāhili e hele nei mai Kahikina o ka Pakipika. E ho’omākaukau ke ‘Ilana pono no kēia wā akekali.

E pule ana wau no kō kākou palekana a me ka hō’ulu’ulu lāhui!

Me ka pumehana, mālama pono,

Kolonahe

E ka lehulehu e

I ko’u ‘ike, ma nā kelepona pa’a lima ‘apala, aia kekahi pā pihi maiā lākou. Inā ‘a’ole loa’a iā ‘oe ka pā pihi no kāu kelepona pa’a lima, loa’a nō kekahi! Ma ke kū’ai hele o nā kelepona ‘anadoroida, loa’a kekahi app i kapa ‘ia e MultiLing keyboard. Inā ho’oili ‘oe i kēlā app a ho’oili ho’i i kona pō’ohui ‘ōlelo Hawai’i, hiki nō ke kikokiko ma ka ‘ōlelo Hawai’i.

Akā na’e ‘a’ole loa’a ka ‘okina pono a ‘ano pa’akikī ka hana ‘ana o ke kahakō, he kinohi no ko mākou lāhui ma ka pūnaewele. He mea ko’iko’i nō.

I ko ‘oukou hana ‘ana i kēia app, he aha kou mana’o nona. E ha’i ia’u ke ‘olu’olu! Mahalo nō a hui hou!

No Ke Kamelo

Aloha mai kākou a welina mai e ka ʻikamu mua loa ke kakaʻina o nā moʻolelo nūpepa. I ka manaʻo ʻana e pili ana kēia mau mea, ʻaʻole e kau ana wau i ka moʻolelo pono o kēia poʻe mea no ka mea loaʻa nō ka moʻolelo. ʻAʻole pono ka manawa ʻalua. No laila eia nō ka moʻolelo mai ka nūpepa Nūpepa Kūʻokoʻa mai ʻOkakopa 1861, a aia i nā huaʻōlelo ʻē a paʻakīkī ma ka hopena o ka moʻolelo. Mahalo no ka heluhelu ʻana a e luana ia.

Eia kekahi mea hou. kamelo
He aha ia mea?
He Kamelo naʻe.
ʻAuwē! Ma hea la ia mea hou?

Eia ma Honolulu nei. E haʻi aku no mākou iā ʻoukou. Ua lawe ʻia mai nei ia holoholona hou mai Kaleponi mai, ma luna o ka Yankee, i kēia malama o Kepakemapa nei. He ʻumi o ia poʻe kamelo i lawe ʻia i Kapalakiko mai ʻĀkia mai, a ua kūkālā ʻia ma laila. Kūʻai ʻo Halewai i kekahi i $250, a lawe mai iā ia i Hawaiʻi nei, i ʻike nā kānaka iā
ia.

He mea hou ke kamelo ma kēia pae ʻāina, he mea kamahaʻo. Ua heluhelu ʻoukou ma nā puke no ke kamelo, ʻaʻole naʻe i ʻike maka. ʻElua nā ʻano o ke kamelo. He kuapuʻu hoʻokahi kahi, a he kuapuʻu ʻalua kahi. ʻOia hoʻi, ma luna o kekahi kamelo, hoʻokahi wale nō puʻu, akā, ma luna o kekahi he mau puʻu ʻelua.
No ka pono o kēia holoholona i nā kānaka o ʻĀkia a me ʻApelika, e hōʻike aku nō mākou i nā mea a pau a mākou e ʻike nei no lākou.

Ua kūpono kēia holoholona i nā ʻāina panoa, a pālahalaha o nā wahi pāpū. Ua hoʻohana ʻia lākou e (nā) kānaka o ia mau ʻāina, a ʻo ke kamelo ke kumu o ko lākou waiwai i laila. Ma nā ʻāina waoakua o ʻAlapia a me ʻApelika ʻākau, e noho ana nā miliona kānaka. Inā ʻaʻole ke kamelo, inā ua hiki ʻole i nā kānaka ke hele ma waena o ia mau ʻāina panoa pālahalaha. He mea kahiko loa ke kamelo, ma Kinohi nā kamelo o Aberahama, o Isaka, a o Iakoba, me Isamaʻela. He mea laka ke kamelo. ʻAʻole i ʻike ʻia kona noho hihiu ʻana. He mea hihiu ka lio, ka pipi, a me ka ʻīlio ma ke kauwahi o ka honua; akā ʻaʻole i ʻike ʻia ka noho ʻana o ke kamelo, ke ʻole ke kanaka i laila, he kahu nona. Ua hana ʻia ʻo ia i kauwā no (ke) kanaka wale nē. No laila, ʻaʻole i haʻawi ʻia nona nā mea pale i nā ʻenemi, e like me nā holoholona ʻē aʻe. Inā e hoʻokuʻu ʻia ʻo ia e ʻimi i kona ola, ʻaʻole ia e pōmaikaʻi i laila, no kona ʻike ʻole ke mālama iā ia iho i nā ʻenemi. Me ke kahu kanaka kona pōmaikaʻi ʻana.

He aha kona waiwai no ke kanaka?

Eia, he mea hali ukana ia. He mea hoʻoholo, me he lio lā.
He mea ola i nā lā he nui me ka inu wai ʻole. Pēlā kona hele ʻana a hala nā lā, me ka ʻai ʻana i nā lau kalakala wale nō e ulu ana ma kahi maloʻo.

ʻO ke kamelo ke ola o nā kānaka e noho ana ma ka waoakua o kēlā mau ʻāina ʻai ʻole, wai ʻole. He mea ʻai ʻia kona ʻiʻo, a he mea inu hoʻi kona waiū. He mea lole kona hulu, a nā wahine e wililopi ai, a ulana i lole paʻa. A he mea wahie kona lepo e moa ai ka ʻai. Inā ʻaʻole ke kamelo, ʻaʻole hoʻi he kanaka ma ia mau ʻāina maloʻo. I ka wā hele, ua hoʻoili ʻia nā ukana a pau ma luna o ke kamelo e lawe aku i kahi e hele ai. Nā hale lole, nā ipu, nā hīnaʻi, nā wāhine me nā keiki, a me nā mea ʻē aʻe. Paʻu loa ia mau mea ma luna o ke kamelo, a hele huakaʻi nā ʻohana ʻArabia e ʻimi ana i ʻāina mauʻu kahi e kūkulu hou ai i ko lākou mau hale lole.

Pēlā hoʻi nā kālepa o ia mau ʻāina. He kamelo ka “moku kālepa o ka waoakua.” E hiki iā ia ke lawe i nā ukana he nui mai nā haneli pauna e hiku a hiki 1200 paona, e like me kona nui ʻana. Ua hoʻokukuli ʻia iho ke kamelo i lalo, a laila, hoʻēʻe aku la nā ukana a kaumaha. A laila, hoʻāla aʻela ʻia i luna. Ua alakaʻi ʻia ma ke kaula pūnuku, ʻaʻole ka hao ma kona waha.

He ʻōpū wai kona, kahi e waiho ai kona wai inu, he hapalua pahu a keu aku i ka inu hoʻokahi ʻana. Pēlā no kona hele ʻana, me ke kahu e noho ana ma luna. A makewai ia, ua hoʻokomo ʻia kekahi wai o ka ʻōpū wai i loko o ka ʻōpū ʻai mauʻu. A hala kekahi mau lā, pau ka wai o ka ʻōpū, ua makewai hou nō ia. I ka wā e kokoke ana ia i ka pūnāwai hou, o kona hele pololei aku la no ia me kona ikaika a pau a hiki i laila.

He aha kēlā puʻu nui ma ke kua?

He ʻiʻo momona ia puʻu, ʻaʻohe iwi ma loko. E like me kona ʻōpūwai ka mea e lōʻihi ai kona hele me ka inu ʻole, pēlā hoʻi kona puʻu ka mea ola no ka ʻai ʻole ʻana. I ka wā ʻai ʻole a lōʻihi, ua komo ka momona o ka puʻu i loko o kona hokua, a lilo ia i mea ola no ke kino. Ia wā, ua ʻemi iho ka puʻu i lalo, a he lōʻihi ka ʻai ʻole ʻana, ua nalowale ka puʻu ma mua o kona make ʻana i ka pōloli.

ʻO ke kanaka waiwai o ʻArabia, he mau kaukani kamelo ko kekahi, a he mau haneli ko kekahi. Ua helu ʻia kona waiwai e like me ka nui o nā kamelo iā ia.

ʻAʻole ma ʻArabia me ʻApelika ʻākau wale nō ko ke kamelo wahi i noho ai. Ma nā ʻāina o ka ʻākau o ʻĀkia, kahi nā one pālahalaha a me kahi wai ʻole, ua hoʻoholo ʻia nā huakaʻi kamelo e like ma ʻArabia. No laila mai kēia kamelo i hiki mai nei. Ua kapa ʻia lakou, he kamelo Baktria. He wāwae pālahalaha hoʻi ko ke kamelo, i hiki ke hele i loko o ke one me ka poho ʻole. ʻAʻohe māiuʻu ʻoʻoleʻa ko ke kamelo e like me ko ka lio; no laila, he mea ʻeha nona ke hele ma luna o nā wahi ʻāpuʻupuʻu, no ka palupalu o kona mau poho wāwae.

He helehelena ʻinoʻino ko ke kamelo, akā, he naʻau akahai kona ke hana ʻino ʻole ia. Akā, inā e hana ʻino aku kona kahu iā ia, a laila, hiki iā ia ke huhū mai, a peku mai i ka mea e kolohe ana iā ia.

I ka poʻe e noho ana ma ka ʻāina waoakua neoneo, ʻaʻohe holoholona waiwai like ʻē aʻe, e hiki ai ke ola pono ke kanaka.

Ma nā ʻāina waena o ʻAmelika ʻĀkau, he nui nā wahi pāpū panoa. ʻAʻole i ola pono na lio hele ma waena o ia mau ʻāina maloʻo, he nui nā mea o lākou i make no ka wai ʻole e inu ai. No laila, ulu ka manaʻo, he mea pono ke kamelo ke hele ma ia mau ʻāina. Hoʻouna aku nā luna aupuni o ʻAmelika, i luna e hele i ʻAigupita a me Suria, e kūʻai i nā kamelo i mea kaʻahele ia mau ʻāina o ʻAmelika waena. A ua kūʻai ʻia nā kamelo he haneli a keu, a ua lawe ʻia mai ma luna o nā moku a hoʻolei ʻia i uka ma Tekasa. Ua hiki pono loa ko lākou hele ʻana ma ia mau wahi panoa. I ka makahiki i hala iho nei ko lākou hele mua ʻana. Ma hope aku nei e lilo paha ia hele ʻana me nā kamelo ma ʻAmelika waena, i hana nui no nā kālepa hele mai nā ʻaoʻao hikina a ke komohana o ʻAmelika.